Xukuumada Soomaaliya oo wali ka hurdi la’ Warbixintii hay’ada Amnesty International.

Wasiir kuxigeenka Wasaarada Warfaafinta Soomaaliya ayaa si faah faahsan uga hadlay dhaliilo ay u jeedinayaan warbixin ay todobaadkii hore soo saartay hay’ada xuquuqda aadanaha u dooda ee Amnesty International

Wasir Aadan Isaaq ayaa qoraalka uu soo dhigay bartiisa Facebook ciwaan uga dhigay “Dowladda iyo Xorriyadda Saxaafadda;” isagoo ku sheegay ineysan jirin dhibaatooyin ay ku hayaan Warbaahinta.

Warbixinta Amnesty dadka diyaariyay ayuu ku sheegay iney yihiin kuwo aan xog-ogaal eheyn, dalkana aan ku sugneyn, isagoo ku tilmaamay kuwa doonaya iney hoos u dhigaan sumcada dowladda.

Waxa uu sidoo kale sheegay ineysan jirin xubno ka socday hay’adan oo dowladda u yimid, balse ay jiraan su’aalo baaristooda la xiriirta oo ay Xukuumada u soo direen, kuwaasoo laftooda aan Jawaabihii laga bixiyay warbixinta ku xusneyn.

Halkan Hoose ka akhriso qoraalka Wasiir Aadan Isaaq:

Dowladda iyo Xorriyadda Saxaafadda;

Amnesty international waa hay’ad caalami ah oo sumcad wanaagsan ku leh adduunka iyo arrimaha xuquuqul insaanka, Laakiin waxaan rabaa in aan sheego in warbixinta ay soo saartay ee la xiriirta saxaafadda Soomaaliya, ay tahay mid aan isu dheelli tirneyn oo ay ku jiraan xogo badan oo aan sugneyn iyo kuwo qabyo ah.

Tusaale ahaan hay’addu intii ay warbixinta diyaarineysay waxba nagama weydiin, sidoo kale ma jirin dad iyaga ka socda oo noo yimid ama wax naga weydiiyay xaaladda saxaafadda dalka.
Sidoo kale lama aysan kulmin hay’adaha kale ee dowladeed ee arrintu khuseyso.

Sida isla warbixinta ku cad, waxaa diyaariyay dad aan dalkaba joogin, taas oo wax u dhimeysa sugnaanta macluumaadka iyo fahamka dhabta ah ee xaqiiqada jirta.

Maalmo ka hor ayay noo soo direen templete su’aalo diyaarsan ah, jawaabihii aan siinneyna aad ugama muuqdaan warbixinta, Dowladda Soomaaliya waxa ay xurmad u haysaa oo dhowreysaa xorriyadda Saxaafadda iyo xorriyadda hadalka guud ahaan.

• Ma jirto cago jugleyn iyo ciriiri gelin lagu hayo saxaafadda iyo saxafiyiinta.
• Dowladda uu hoggaamiyo madaxweyne Maxamed Cabdullaahi Farmaajo ma jiro wariye u xiran, ama makamadeyntiisu socoto ama maxkamadi doondooneyso.
• Waxaa jiray askar si xun ula dhaqmay saxafiyiin tallaabo laga qaaday lana xiray.
• Ma jirto xog helis laga hor joogsday saxaafadda, waxaase jirta in xilliyada qaar la xaddido galista goobaha ay qaraxyadu ka dhacaan taas oo loogu daneynayo wariyeyaasha iyo dadka rayidka ah inta laga hubinayo in aan khatar kale ka jirin goobta.
• Marar badan waxaa dhacda in qarax labaad ka dhaco goobta, taas oo ay wariyeyaal iyo dad kaleba wax ku gaaraan, waxay horay uga dhacday Hoteel Saxafi, Dayax, Hooyooyinka,Jazeera iyo goobo kale oo mararka qaar wariyeyaal wax ku noqdeen.
• Nasiiba darro wariyeyaasha qaar ayaa goobaha qaraxyada taga oo si toos ah live ugu soo tabiyay dad gubanaya, kuwo dhiig baxaya, iyo maydad dhulka waran, taas oo ka soo horjeedda qawaaniinta caalamiga ah iyo anshaxa saxaafadda.
• Dowladdu waxay ku dhaqantaa sharci, dastuurkeenna iyo shuruucda kale ee dalka ayaa damaanad qaadaya xorriyadda hadalka.
• Ma ogin facebookyo dad laga xiray, dowladduna ma oggola arrintaas oo ah sheegasho aan caddeyn loo hayn.